ប៉េកាំង៖ ស្ថានទូតរុស្ស៊ីនៅទីក្រុងប៉េកាំងបានបញ្ជាក់ថា រដ្ឋមន្ត្រីការបរទេសរុស្ស៊ី លោក Sergei Lavrov បានទៅដល់ប្រទេសចិនហើយនៅថ្ងៃពុធ ទី៣០ ខែមីនា ឆ្នាំ២០២២នេះ។

យោងតាមបណ្ដាញសង្គម Weibo របស់ខ្លួនស្ថានទូតរុស្ស៊ីប្រចាំប្រទេសចិនបានឱ្យដឹងថាយន្តហោះដឹកលោក Lavrov បានចុះចតនៅទីក្រុង Huangshan ភាគខាងកើតប្រទេសចិន ដើម្បីចូលរួមកិច្ចប្រជុំជាបន្តបន្ទាប់ដែលរៀបចំដោយប្រទេសចិន ដើម្បីពិភាក្សាអំពីវិធីជួយអាហ្វហ្គានីស្ថាន ដោយមានអ្នកការទូតមកពីសហរដ្ឋអាមេរិកនិងប្រទេសជិតខាងដែលដឹកនាំដោយតាលីបង់ក៏ត្រូវបានគេរំពឹងថានឹងចូលរួមផងដែរ។

ទីក្រុងប៉េកាំងបានឱ្យដឹងថា រដ្ឋមន្ត្រីការបរទេសចិនលោក Wang Yi នឹងជួបប្រជុំរួមគ្នាជាមួយតំណាងនៅក្នុងកិច្ចប្រជុំ ប៉ុន្តែវាមិនច្បាស់ទេថាតើលោកនឹងជួបមួយទល់មួយជាមួយលោក Lavrov ដែរឬទេ?

ទោះជាយ៉ាងណាគេយល់ថាការវាយប្រហាររបស់រុស្ស៊ីលើអ៊ុយក្រែនទំនងជាបញ្ហាធំជាងអាហ្វានីស្ថាន។

មិនដូចប្រទេសលោកខាងលិចជាច្រើនទេ ប្រទេសចិនបានបដិសេធមិនថ្កោលទោសការលុកលុយ ហើយបានដើរជាមួយប្រទេសជាច្រើនទៀតក្នុងការផ្តល់ជំនួយមនុស្សធម៌ដល់អ៊ុយក្រែន៕